ਮੌਤ ਮੇਰੀ ਦਾ ਮਾਤਮ

ਚੱਲੀਏ ਯਾਰੋ ਵਕਤ ਆ ਗਿਆ,

ਜ਼ਿੰਦਗੀ ਤਾਂਈਂ ਇਸ਼ਕ ਖਾ ਗਿਆ,

ਇਹ ਤਨ ਮਿੱਟੀ ਹੋਣਾ ਸੱਜਣੋ, ਪਲ ਦੋ ਪਲ ਪ੍ਰਾਹੁਣਾ ਹੈ ।

ਮੈਂ ਮਰ ਚੱਲਿਆ, ਮੌਤ ਮੇਰੀ ਦਾ ਮਾਤਮ, ਇੰਝ ਮਨਾਉਣਾ ਹੈ ॥

ਬਣ ਗਿਆ ਮੇਰੀ ਮੌਤ ਦਾ ਕਾਰਨ, ਮੇਰਾ ਦਿਲਵਰ ਜਾਨੀ ਜੋ ।

ਅਰਥੀ ਉਪਰ ਸਜਾ ਲਿਓ ਉਹਦੀ, ਕੱਲੀ ਕੱਲੀ ਨਿਸ਼ਾਨੀ ਜੋ ।

ਕੱਫ਼ਨ ਉਪਰ ਨਾਮ ਓਸ ਦਾ, ਕਾਤਿਲ ਕਹਿ ਲਿਖ਼ਵਾਉਣਾ ਹੈ ।

ਮੈਂ ਮਰ ਚੱਲਿਆ, ਮੌਤ ਮੇਰੀ ਦਾ ਮਾਤਮ, ਇੰਝ ਮਨਾਉਣਾ ਹੈ ॥

ਲੱਕੜਾਂ ਦੀ ਨਹੀਂ ਲੋੜ ਤੁਸਾਂ ਨੂੰ, ਖ਼ਤਾਂ ਨਾਲ ਜਲ ਜਾਣਾ ਮੈਂ ।

ਵਿੱਚ ਸੰਦੂਕ ਸਾਂਭ ਕੇ ਰੱਖ਼ਿਆ, ਇੱਕ ਇੱਕ ਖ਼ਤ ਪੁਰਾਣਾ ਮੈਂ ।

ਖ਼ਤਾਂ ਨਾਲ ਇੱਕ ਫੁੱਲ ਮੁਰਝਾਇਆ, ਉਹ ਵੀ ਨਾਲ ਜਲਾਉਣਾ ਹੈ ।

ਮੈਂ ਮਰ ਚੱਲਿਆ, ਮੌਤ ਮੇਰੀ ਦਾ ਮਾਤਮ, ਇੰਝ ਮਨਾਉਣਾ ਹੈ ॥

ਇੱਕ ਰੁਮਾਲ ਪਈ ਐ ਸਾਂਭੀ, ਬੰਨ੍ਹੀ ਗੰਢ ਜਿਹੀ ਮਾਰ ਉਹ ।

ਨਿਕਲੂ ਚੀਜ਼ ਜੋ ਦਿੱਤੀ ਓਦੋਂ, ਮਿਲੀ ਸੀ ਪਹਿਲੀ ਵਾਰ ਉਹ ।

ਤਬੀਤ ’ਚ ਦੋਵਾਂ ਦੀ ਹੈ ਫੋਟੋ, ਜੱਗ ਤੋਂ ਜਿਹਨੂੰ ਛੁਪਾਉਣਾ ਹੈ ।

ਮੈਂ ਮਰ ਚੱਲਿਆ, ਮੌਤ ਮੇਰੀ ਦਾ ਮਾਤਮ, ਇੰਝ ਮਨਾਉਣਾ ਹੈ ॥

ਇੱਕ ਦੋ ਚੀਜ਼ਾਂ ਹੋਰ ਹੋਣੀਆਂ, ਅੰਦਰ ਵਿੱਚ ਅਲਮਾਰੀ ਦੇ ।

ਰੱਖ ਕੇ ਚੇਤਾ ਭੁੱਲ ਗਿਆਂ ਮੈਂ, ਉਲਝਿਆਂ ਵਿੱਚ ਬਿਮਾਰੀ ਦੇ ।

ਬਰਬਾਦੀ ਮੇਰੀ ਸਾਜ਼ ਸਮਾਨ ਜੋ, ਥੋਡੇ ਕਿਸ ਕੰਮ ਆਉਣਾ ਹੈ ।

ਮੈਂ ਮਰ ਚੱਲਿਆ, ਮੌਤ ਮੇਰੀ ਦਾ ਮਾਤਮ, ਇੰਝ ਮਨਾਉਣਾ ਹੈ ॥

ਖ਼ੁਸ਼ ਹੋ ਜਾਊ ਖ਼ਬਰ ਘੱਲ੍ਹ ਦਿਓ, ਉਹਨੂੰ ਵੀ ਇਸ ਭਾਣੇ ਦੀ ।

ਉਹ ਵੀ ਇਹੀਓ ਸੁੱਖ ਲੋੜਦੀ ਸੀ, " ਘੁਮਾਣ" ਨਿਮਾਣੇ ਦੀ ।

ਗਿੱਧਾ ਪਾਉਂਦੀ ਆਵੇ ਜੇ ਉਸ, ਸੋਗ ਵਾਸਤੇ ਆਉਣਾ ਹੈ ।

ਮੈਂ ਮਰ ਚੱਲਿਆ, ਮੌਤ ਮੇਰੀ ਦਾ ਮਾਤਮ, ਇੰਝ ਮਨਾਉਣਾ ਹੈ ॥

ਲੇਖਕ : ਜਰਨੈਲ ਘੁਮਾਣ

email : ghuman5577@yahoo.com

contact no : 098885-05577

Posted by : jarnail ghuman

************************************************************

 About jarnail ghuman key words : jarnail singh ghuman , punjabi geet- sangeet, punjabi song/ songs,deshi punjabi song, punjabi music, punjabi Films ,sada punjab,apna punjab, mera punjab , rangla punjab,jatt punjabi, sher punjabi, punjabi jokes .punjabi virsa ,punjab news, punjabi articles, punjabi stories, punjabi books, aapna punjab.com, sur sangam , cmc , studio sur sangam, punjabi chutkale , virsa , virasat , apna pind , kabbadi, news, punjabi music album , punjabi video .media junctions.