ਇੱਕ ਤਸਵੀਰ ਮਿਲੀ ਦੋਸਤੋ

ਕੱਲ੍ਹ ਮੈਨੂੰ, ਇੱਕ ਤਸਵੀਰ ਮਿਲੀ ਦੋਸਤੋ ।

ਲੱਭਦਾ ਸਾਂ ਕੁੱਝ, ਬੈਠਾ ਬੈਠਾ ਮੈਂ ਚੁਬਾਰੇ ਚੋਂ,

ਹੱਥ ਲੱਗੀ ਮੇਰੇ, ਅਲਮਾਰੀ ਦੇ ਕਿਨਾਰੇ ਚੋਂ,

ਖੇੜਿਆ ਦੇ ਜਾ ਵਸੀ, ਹੀਰ ਮਿਲੀ ਦੋਸਤੋ ।

ਕੱਲ੍ਹ ਮੈਨੂੰ, ਇੱਕ ਤਸਵੀਰ ਮਿਲੀ ਦੋਸਤੋ ॥

ਧੁੰਦਲੀ ਜਿਹੀ ਸੀ, ਝਾੜ ਪੂੰਝਕੇ ਪਛਾਣ ਹੋਈ ।

ਨਕਸ਼ ਗੁਆਚੇ ਜਿਹੇ, ਖਿੱਚ ਗਏ ਧਿਆਨ ਕੋਈ ।

ਗੁੰਮ ਚੁੱਕੀ ਯਾਦਾਂ ਵਾਲੀ, ਭੀੜ ਮਿਲੀ ਦੋਸਤੋ ।

ਕੱਲ੍ਹ ਮੈਨੂੰ, ਇੱਕ ਤਸਵੀਰ ਮਿਲੀ ਦੋਸਤੋ ॥

ਦੱਬ ਗਏ ਸੀ ਗ਼ਮ ਜਿਹੜੇ, ਹੰਝੂਆਂ ਦੇ ਥੱਲੇ ਹੁਣ ।

ਭੁੱਲਗੇ ਭੁੱਲਾਗੇ ਦਿਨ, ਤਾਜ਼ੇ ਹੋਣ ਚੱਲੇ ਹੁਣ ।

ਸਂੌ ਚੁੱਕੀ ਅੱਜ ਉਹੀਓ,ਪੀੜ ਮਿਲੀ ਦੋਸਤੋ ।

ਕੱਲ੍ਹ ਮੈਨੂੰ, ਇੱਕ ਤਸਵੀਰ ਮਿਲੀ ਦੋਸਤੋ ॥

ਕਿੰਨੇ ਸਾਲ ਪਹਿਲਾਂ ਸਾਡਾ, ਹੁੰਦਾ ਸੀ ਪਿਆਰ ਗੂੜ੍ਹਾ ।

ਇੱਕ ਅਨਭੋਲ ਚਿਹਰਾ, ਹੁੰਦਾ ਸਾਡਾ ਯਾਰ ਗੂੜ੍ਹਾ ।

ਲੰਘੇ ਵਕਤਾਂ ਦਾ ਪੰਧ, ਚੀਰ ਮਿਲੀ ਦੋਸਤੋ।

ਕੱਲ੍ਹ ਮੈਨੂੰ, ਇੱਕ ਤਸਵੀਰ ਮਿਲੀ ਦੋਸਤੋ ॥

ਇੱਲਤਾਂ ਦੀ ਜੜ੍ਹ ਸੀ ਉਹ, ਬਹੁਤ ਸਤਾਉਂਦੀ ਹੁੰਦੀ ।

ਬੱਚਿਆਂ ਦੇ ਵਾਗੂੰ, ਗੱਲ ਗੱਲ ਤੇ ਚਿੜ੍ਹਾਉਂਦੀ ਹੁੰਦੀ ।

ਮਿੱਠੜੀ ਜ਼ੁਬਾਨ, ਖੰਡਖੀਰ ਮਿਲੀ ਦੋਸਤੋ ।

ਕੱਲ੍ਹ ਮੈਨੂੰ, ਇੱਕ ਤਸਵੀਰ ਮਿਲੀ ਦੋਸਤੋ ॥

ਰੁੱਸ ਜਾਂਦੀ, ਮੰਨ ਜਾਂਦੀ, ਦਿਨ ਵਿੱਚ ਕਿੰਨੀ ਵਾਰੀ ।

ਮੈਂ ਵੀ ਉਸ ਖਿਡੌਣੇ ਜੇ ਨੂੰ, ਰੱਖਦਾ ਸਾਂ ਜਾਨੋ ਪਿਆਰੀ ।

ਮੇਰੀ ਉਹਦੀ ਐਸੀ ਹੀ, ਤਸ਼ੀਰ ਮਿਲੀ ਦੋਸਤੋ ।

ਕੱਲ੍ਹ ਮੈਨੂੰ, ਇੱਕ ਤਸਵੀਰ ਮਿਲੀ ਦੋਸਤੋ ॥

ਪਿਆਰ ਦੀਆਂ ਬਾਤਾਂ ਪਾਉਂਦੇ, ਸਾਰੀ ਸਾਰੀ ਰਾਤ ਅਸੀਂ ।

ਆਪਣੀ ਬਣਾ ਕੇ ਰੋਂਦੇ, ਕੱਲੀ ਕੱਲੀ ਬਾਤ ਅਸੀਂ ।

ਆਸ਼ਕਾਂ ਦੀ ਜੋ ਨਾ, ਤਕਦੀਰ ਮਿਲੀ ਦੋਸਤੋ

ਕੱਲ੍ਹ ਮੈਨੂੰ, ਇੱਕ ਤਸਵੀਰ ਮਿਲੀ ਦੋਸਤੋ ॥

ਕੱਠਿਆਂ ਨੇ ਜਿਉਣਾ ਅਤੇ, ਕੱਠੇ ਮਰ ਜਾਣਾ ਅਸੀਂ ।

ਛੱਡਣਾ ਨਾ ਸਾਥ, ਕੀਤੇ ਵਾਅਦੇ ਨੂੰ ਨਿਭਾਣਾ ਅਸੀਂ ।

ਵਾਅਦਿਆਂ ਦੀ ਪੰਡ, ਲੀਰੋ ਲੀਰ ਮਿਲੀ ਦੋਸਤੋ ।

ਕੱਲ੍ਹ ਮੈਨੂੰ, ਇੱਕ ਤਸਵੀਰ ਮਿਲੀ ਦੋਸਤੋ ॥

ਬਣ ਗਏ ਹਾਲਾਤ ਕੁੱਝ, ਏਦਾਂ ਸਾਡੇ ਪਿਆਰ ਦੇ ।

ਕੌਣ ਲੜ ਲਾਉਂਦਾ, ਧੀ ਨੂੰ ਬੇ ਰੁਜ਼ਗਾਰ ਦੇ ।

ਮਾਪਿਆਂ ਦੀ ਖਿੱਚੀ, ਇਹ ਲਕੀਰ ਮਿਲੀ ਦੋਸਤੋ ।

ਕੱਲ੍ਹ ਮੈਨੂੰ, ਇੱਕ ਤਸਵੀਰ ਮਿਲੀ ਦੋਸਤੋ ॥

ਆਖਿਰ ਨੂੰ ਦੋਹਾਂ ਤਾਈਂ, ਮਨ ਸਮਝਾਉਣਾ ਪਿਆ ।

ਵਾਰੋ ਵਾਰੀ ਰੋਂਦੇ, ਇੱਕ ਦੂਜੇ ਨੂੰ ਵਿਰਾਉਣਾ ਪਿਆ ।

ਕੋਈ ਜਿੰਦ ਧਰਦੀ ਨਾ, ਧੀਰ ਮਿਲ਼ੀ ਦੋਸਤੋ ।

ਕੱਲ੍ਹ ਮੈਨੂੰ, ਇੱਕ ਤਸਵੀਰ ਮਿਲੀ ਦੋਸਤੋ ॥

ਮੁੱਦਤਾਂ ਦੇ ਬਾਅਦ ਮੁੜ, ਯਾਦਾਂ ਨੇ ਝੰਜੋੜਿਆ ।

ਗਰੀਬੀਆਂ " ਘੁਮਾਣ " ਦਾ ਸੀ ਯਾਰ ਵਿਛੋੜਿਆ ।

ਕਰਨੀ ਕੀ ਜ਼ਿੰਦਗੀ, ਅਮੀਰ ਮਿਲੀ ਦੋਸਤੋ ।

ਕੱਲ੍ਹ ਮੈਨੂੰ, ਇੱਕ ਤਸਵੀਰ ਮਿਲੀ ਦੋਸਤੋ ॥

ਲੇਖਕ : ਜਰਨੈਲ ਘੁਮਾਣ

email : ghuman5577@yahoo.com

contact no : 098885-05577

Posted by : jarnail ghuman

************************************************************
About jarnail ghuman : jarnail singh ghuman , punjabi geet- sangeet, punjabi song/ songs,deshi punjabi song, punjabi music, punjabi Films ,sada punjab,apna punjab, mera punjab , rangla punjab,jatt punjabi, sher punjabi, punjabi jokes .punjabi virsa ,punjab news, punjabi articles, punjabi stories, punjabi books, aapna punjab.com, sur sangam , cmc , studio sur sangam, punjabi chutkale , virsa , virasat , apna pind , kabbadi, news, punjabi music album , punjabi video .media junctions.